Əgər bir iş yerində uğurlu karyera qurmaq istəyirsinizsə, mütləq ünsiyyət bacarıqlarına sahib olmalısınız. Ünsiyyət bacarıqları dedikdə, burada təkcə hər hansı bir şəxslə, ya da kollektivlə olan qarşılıqlı ünsiyyət nəzərdə tutulmur. Ünsiyyət bacarıqlarına "e-poçt"la həyata keçirdiyiniz yazışmalar, telefon danışıqlarınız, sosial şəbəkələr vasitəsilə apardığınız söhbətlər, həmçinin, bədən dilindən düzgün istifadə etmək bacarığı da daxildir. Bu baxımdan karyera pillələrində sürətlə irəliləmək istəyirsinizsə, iş yerində ünsiyyətlə bağlı bir çox amilləri nəzərə almalısınız.

Kim istəməz ki, işlədiyi müəssisədə vəzifəsini artırsınlar? Ancaq məlumdur ki, hər kəs uğur qazana bilmir. Elə olur ki, işçinin böyük təcrübəsi və ya biliyi olur, amma vəzifədə yüksələ bilmir. Lakin ünsiyyətcil həmkarı cəmi bir ildir işə gəlir və çox keçmir ki, vəzifədə yüksəlir. Sizcə, buna "bəxt" demək doğrudurmu? Əlbəttə, xeyr. Bu, hamı ilə ortaq dil tapmaq, öz istedadını büruzə vermək bacarığıdır.

Bəs, bu bacarıqlara necə yiyələnmək olar? Aşağıdakı məsləhətlərə əməl etməyə çalışmaqla, karyeranızda uğurlu yüksəliş edə bilərsiniz.

- Unutmayın, dürüstlük hər şeydən üstündür. İşəgötürənlər təkcə biznes prosesləri haqqında deyil, həm də işçiləri haqqında dəqiq, vaxtında məlumat almaq istəyirlər. Səhvə yol vermisinizsə və ya nədənsə əmin deyilsinizsə, bunu etiraf etməyi bacarın və bir daha bunu etməməyi öyrənin. İş yerlərində həmişə kimsə sizi müşahidə edirmiş kimi davranın.

- İş etikasına riayət etmək həmişə karyera yüksəlişi üçün vacibdir. Özünü idarə etmək bacarığı olmadan başqalarını idarə etmək mümkün deyil. İşə vaxtında gəlib, vaxtında getməyə çalışın. İş saatlarında sizinlə əlaqəsi olmayan məsələlərə vaxt ayırmayın.

- Həmişə öyrənin. Vəzifənizi və maaşınızı artırmaq üçün daim özünüzü təkmilləşdirməli və bacarıqlarınızı artırmalısınız. İş dünyası çox dəyişkəndir. Bu gün rahatlıqla görə bildiyiniz işləri 5-10 il sonra bacarmaya bilərsiniz.

- İşəgötürənlər və menecerlər onlarla asanlıqla dil tapan insanlarla - işdə əlverişli atmosfer yaradan komanda ilə işləməyi sevirlər. Ən stresli anlarda belə insanlara xoş rəftar göstərsəniz, bu, sizi hamının sevimlisinə çevirəcək.

- İşdə fədakarlıq etməkdən çəkinməyin. Şəxsi vəsaitinizə və resurslarınıza necə qənaət edirsinizsə, işlədiyiniz müəssisələrin də vəsaitlərinə və resurslarına o cür qənaət etməyə çalışmalısınız.

- Həm işdə, həm də kənarda şirkətinizə sadiq olun. İşəgötürənlər şirkəti ictimaiyyət arasında təmsil edə bilməyən insanlarla iş görmək istəmirlər. Sadiqliyiniz hər şeydə özünü göstərməlidir: həm məşğul olduğunuz biznesə münasibətdə, həm də ondan kənarda (o cümlədən, sosial şəbəkələrdə) şirkət haqqında məlumat verərkən. Sosial media imiciniz şirkətinizin dəyərlərinə uyğun olmalıdır.

- Günümüzün yarısını işdə keçiririk. Belə olan halda da, təbii olaraq iş yerində müəyyən problemlərlə qarşılaşırıq. Ona görə də, problemlərinizi açıq formada həll etməyə çalışın. Heç vaxt problemlərinizi insanlarla təkbətək müzakirə etməyə çalışmayın. Bu, digər iş yoldaşlarınızda onlara etimad etmədiyiniz hissini aşılaya bilər.

- Sözünüzü birbaşa insanların özünə deyin. Heç kimin arxasınca danışmağa çalışmayın. İş yerində bir insanın haqsız olduğunu görsəniz, bunu deməkdən çəkinməyin. İnsanları dostunuz olduğuna görə deyil, haqlı olduğuna görə dəstəkləyin.

- Heç vaxt səs-küylü yerlərdə mühüm lahiyələrlə bağlı təqdimat verməyin. Çünki bu, anlaşılmazlıqlara səbəb ola bilər. Heç kim nə demək istədiyinizi başa düşməyəcək və beləliklə, layihəniz əhəmiyyətini itirəcək. Buna görə də, işlə bağlı vacib məlumatları hər kəsin sizi dinlədiyindən əmin olduqdan sonra bölüşməyə çalışın.

- Həmkarlarınıza istehza etməyin. Bu, anlaşılmazlıqlara və ya münaqişələrə səbəb olmaqla yanaşı, qeyri-sağlam komanda atmosferi yarada bilər. Əgər münaqişə baş verərsə, qarşı tərəfin sizin yanınıza gəlməsini və baş verənləri müzakirə etməsini gözləməyin. Təşəbbüsü öz əlinizə götürün və ilk əlaqə quran siz olun. Baş verənlər haqqında danışmağı öyrənin. Heç vaxt həmkarlarınızı günahlandırmayın. Harada günahkar olduğunuzu anlamağa çalışın və bunu deyin ki, konstruktiv dialoq qura biləsiniz.

- Şəxsi problemlərinizi ofisdən kənarda saxlayın. Problemlərinizi işə gətirməməyə çalışın. Birincisi, bu, diqqətinizin tapşırıqlara yönəlməsinə mane olacaq, ikincisi, belə vəziyyətdə heç kimə yaxşılıq etmiş olmayacaqsınız.

- Dinləmək çox sadə bir bacarıq kimi görünə bilər: otur, sus və qulaq as. Əslində, bu, biznes liderləri və sahibkarlar tərəfindən getdikcə daha çox qiymətləndirilən çox güclü bir vasitədir. Aktiv dinləmə iş yerinizdə münasibətlərinizi 100% zənginləşdirəcək, həm sizin, həm də qrupun məhsuldarlığını 100% artıracaq.

Əgər hər hansı münaqişə zamanı vəziyyətin son həddə çatdığını görsəniz və neqativlikdən qaçmağın qeyri-mümkün olduğunu anlasanız, o zaman aktiv dinləmənin köməyi ilə bu anlaşılmazlığı müsbət istiqamətə çevirə bilərsiniz. Çünki aktiv dinləmə söhbətdən maksimum nəticə əldə etmək üçün açardır. Statistikaya görə, bir insan başqasını yalnız 25% səmərəliliklə dinləyir, yəni, alınan məlumatların 75%-i sadəcə olaraq "havaya uçur". Aktiv şəkildə dinləmək üçün siz mümkün qədər rəqibinizin dediklərinə diqqət etməlisiniz. Yəni, deyilən sözlərin mənasını anlamağa, onun verdiyi mesajı tutmağa çalışmalısınız. Bu, həm də münasibətləri daha dərin səviyyəyə aparmaq deməkdir.

- Biri ilə söhbət edərkən sözünü yarıda kəsməyin və fikrini tamamlamasına imkan verin. İşçinin öz fikrini ifadə edə bilməsi və onun eşidiləcəyini bilməsi məhsuldarlığını bir neçə dəfə artırır.

- Danışarkən həmsöhbətinizlə göz təması qurun. Söhbət zamanı hər hansı başqa fəaliyyətdən çəkinin.

- İnsan ölçülü-biçili danışanda onun həmsöhbəti məlumatı daha yaxşı qəbul edir. Danışarkən "fasilədən" qorxmayın və növbəti sözünüzü necə deyəcəyinizi düşünmək üçün özünüzə vaxt verin.

- İşgüzar yazışmalar aparmaq bacarığı uğurlu ünsiyyət məsələsində vacib məqamdır. Bir çoxları işdən sonra gələn məktubları, sosial şəbəkələrdən gələn mesajları çox da müsbət qarşılamırlar. İş saatlarından sonra, xüsusən də sosial şəbəkələrdə kiməsə işgüzar suallar yazsanız, bu sizi başqalarının şəxsi sərhədlərinə hörmətsizlik edən bir insan kimi xarakterizə edə bilər. Əgər iş saatları ərzində işgüzar məqamlardan istifadə edə bilmirsinizsə, deməli, kifayət qədər səmərəli deyilsiniz. İşini evə aparan insanın əla işçi olduğunu düşünmək səhvdir. O, sadəcə olaraq, ayrılmış vaxtda ofis daxilində görməli olduğu işin öhdəsindən gəlmir.

- Tənqidlərə qulaq asmağı öyrənin. Konstruktiv tənqidə qulaq asmağı bilməyən insanlar bir növ "köpük" içində yaşamaq istəyən insanlardır. Sizə ünvanlanan tənqidi eşidəndə, həmin insandan bu barədə nə düşündüyünü soruşmaq lazımdır. Yəni, sizi tənqid edəndən məsləhət alın. Bu, həm də çox vacib bir ünsiyyət bacarığıdır.